← Back to list

Covid-19: இந்தியாவில் முதல் மரணம்!

Mar 13, 2020

இந்தியாவில், Coronavirus தொற்றுக்கு முதல் நபர் பலியாகியிருக்கின்றார்.

கர்நாடகாவில், அக்கிருமித் தொற்றுக்கு சிகிச்சைப் பெற்று வந்த 76 வயது முதியவர் ஒருவர் பொது மருத்துவமனையில் இருந்து தனியார் மருத்துவமனைக்கு மாற்றப்படும் போது உயிரிழந்ததாக கூறப்படுகிறது.

ஜனவரி மாதம் சௌதி அரேபியாவுக்குச் சென்றிருந்த அம்முதியவர் கடந்த மாதம் தான் இந்தியாவுக்கு திரும்பியுள்ளராம்.

அம்முதியவருக்கு உயர் ரத்த அழுத்தம், நீரிழிவு, ஆஸ்துமா, குடல் அழற்சி போன்ற இதர சில உடல் உபாதைகளும் இருந்ததாக அதிகாரிகள் தெரிவித்துள்ளனர்.

அம்முதியவரின் மரணத்தை அடுத்து, அவருடன் தொடர்பில் இருந்த குடும்ப உறுப்பினர்கள் உள்ளிட்ட அனைவரையும் அடையாளம் கண்டு, அவர்களை பரிசோதித்து, தனிமைப்படுத்தும் நடவடிக்கைகள் தொடங்கியுள்ளன. 

பிரதமர் மோடி ஆலோசனை:

இந்நிலையில், Covid-19 பரவல் குறித்து பதற்றமடைய வேண்டாம்; முன்னெச்சரிக்கை நடவடிக்கைகளை மேற்கொள்ளுமாறு பிரதமர் நரேந்திர மோடி தனது twitter-ரில் பதிவிட்டிருந்தார்.

இப்போதைக்கு புது டெல்லியில், பள்ளிகள், கல்லூரிகள், திரையரங்குகள் அனைத்தும் மார்ச் 31-ஆம் தேதி வரை தற்காலிகமாக மூடப்பட்டிருப்பதாகவும் தகவல் கூறுகின்றது.

இந்தியாவுக்கான பயணிகள் விசா வசதி, இன்று நள்ளிரவு தொடங்கி ஏப்ரல் 15ஆம் தேதி வரை தற்காலிகமாக ரத்துச் செய்யப்படுகிறது.

தூதரக அதிகாரிகள், ஐநா அல்லது அனைத்துலக அமைப்புகள், பணி நிமித்தப் பயணம் அல்லது அலுவல் திட்ட ரீதியான விசாக்களுக்கு மட்டும் இதில் விலக்கு அளிக்கப்படுகின்றது.

Covid-19 பரவலை, உலக சுகாதார நிறுவனம் கொள்ளை நோயாக அறிவித்திருப்பதை அடுத்து, இந்த தற்காலிக தடை அமுலுக்கு வருகின்றது.

கடந்தாண்டு டிசம்பரில் முதன் முறையாக சீனா Wuhan-னில் பரவிய இந்த வைரஸ், தற்போது உலகம் முழுவதும் 114 நாடுகளுக்கு பரவி, பெரும் அச்சத்தை ஏற்படுத்தியிருக்கின்றது.

உலகளவில், அக்கிருமி தொற்றால் உயிரிழந்தவர்கள் எண்ணிக்கை ஐயாயிரத்தை நெருங்கியுள்ள நிலையில், ஒரு லட்சத்து 34 ஆயிரம் உறுதிப்படுத்தப்பட்ட சம்பவங்கள் பதிவாகியுள்ளன.

இந்தியாவில் மட்டும் ஏறக்குறைய 73 பேருக்கு இக்கிருமித் தொற்றுப் பீடித்துள்ளது.