← Back to list

உடல் ஊனம் வெற்றிக்குத் தடையல்ல!

Jun 19, 2019

மாற்றுத்திறனாளியான 26 வயது சுரேஷ் அண்மையில் ஹாலந்தில் நடந்த 2019 உலக பாரா அம்பெய்தல் போட்டியில் தங்கப் பதக்கம் வென்றார்.

இறுதி ஆட்டத்தில் அமெரிக்காவைச் சேர்ந்த Eric Bennettடை 7-3 என வீழ்த்திய சுரே‌ஷ் அவ்வெற்றியின் வழி, 2020 தோக்கியோ பாரா ஒலிம்பிக் போட்டிக்கும் நேரடி தகுதி பெற்றுள்ளார்.

அத்தகைய மகத்தான வெற்றி பெற்ற சுரேஷ் வாழ்க்கையின் மறு பக்கம் தான் என்ன?

13 வயதில் தனது தந்தை ஓட்டிச் சென்று கொண்டிருந்த லாரி விபத்தில் சிக்கி, அதில் தனது இடது காலை இழந்தார் சுரேஷ்.

இது நடந்து சில நாட்களே ஆன நிலையில், விபத்தொன்றில் தனது சகோதரியையும் அவர் இழந்தார்.

இது ஒரு பக்கமிருக்க மனஸ்தாபம் காரணமாக சுரேஷின் தாயும் தந்தையும் பிரியும் நிலை ஏற்பட, தனித்து வாழும் தாயாக திருமதி தேவனி சந்திரன் சுரேஷையும் அவரது தம்பியையும் வளர்த்தார்.

வாழ்க்கை இவ்வாறே நகர, 19 வயதில் தனது மாற்றுத்திறனாளி நண்பனின் அறிமுகத்தால் அம்பெய்தும் துறையில் கால் பதித்தார் சுரேஷ்.

ஆரம்ப காலத்தில் அதில் அதிக ஆற்றல் இல்லாத சுரேஷ், நாள்பட தனது திறமையை வளர்த்துக் கொண்டார்.

தன்னம்பிக்கையுடனும் விடாமுயற்சியுடனும் அடுத்தடுத்து பல போட்டிகளில் பங்கேற்றார்.

ஒரு வழியாக தனது அம்முயற்சியின் பலனாக பதக்கங்கள் அள்ளிக் குவித்தார் சுரேஷ்.

முன்னதாக துபாயில் நடந்த அம்பெய்தும் போட்டியொன்றில் அவர் வெள்ளிப் பதக்கம் வென்றார்.

தற்போது உலக வெற்றியாளராகியிருக்கும் அவர், தோக்கியோ பாராலிம்பிக்கில் தங்கம் வெல்வதோடு உலக சாதனையையும் முறியடிக்க இலக்கு கொண்டுள்ளார்.

அவரது அந்த இலக்கு நிறைவேற அரசாங்கமும், நாட்டு மக்களும் அவருக்கு முழு ஆதரவையும், அன்பையும் வழங்குவர் என ராகா செய்தி பிரிவு எதிர்பார்க்கிறது.

உலகப் போட்டியில் சாதித்த சுரேஷ் ஒலிம்பிக்கிலும் சாதித்து மலேசியாவின் பெயரை மணம் கமழச் செய்ய வாழ்த்துவோமாக!

By Thivyah Vegan John