← Back to list

வீட்டிலிருந்தே வேலை செய்ய அரசாங்க உத்தரவு!

Oct 20, 2020

நாட்டில் Covid-19 சம்பவங்களின் எண்ணிக்கை நாளுக்கு நாள் அதிகரித்து வரும் நிலையில், அதனைக் கட்டுப்படுத்த மக்களின் நடமாட்டத்தைக் குறைக்க அரசாங்கம் கடப்பாடு கொண்டுள்ளதாக தற்காப்பு அமைச்சர் தெரிவித்தார்.

எனவே வரும் வியாழக்கிழமை தொடங்கி நிபந்தனைக்குட்பட்ட நடமாட்டக் கட்டுப்பாட்டு ஆணை அமுலில் உள்ள பகுதிகளைச் சேர்ந்தோர், வீட்டிலிருந்த படியே வேலை செய்ய பணிக்கப்படுவதாக Datuk Sri Ismail Sabri Yaakob இன்று அறிவித்தார்.

அரசாங்கத்தின் இந்த உத்தரவு 80 ஆயிரத்துக்கும் அதிகமான அரசு மற்றும் தனியார் நிறுவன ஊழியர்களை உட்படுத்தியிருப்பதாக அமைச்சர் சொன்னார்.

எனினும் வேலையிடத்தில் இருந்து வேலை செய்ய வேண்டிய கட்டாயத்தில் இருப்போருக்கு தளர்வு வழங்கப்படுகிறது.

சிவப்பு மண்டலப் பகுதிகளைச் சேர்ந்தோர் அலுவலகம் அல்லது வேலையிடத்திற்குச் செல்ல வேண்டுமானால் Covid-19 பரிசோதனை மேற்கொள்ள வேண்டும்.

அதற்கான செலவீனங்களை Socso ஏற்றுக் கொள்ளும்.

இந்த உத்தரவு தொடர்பான மேல் விவரங்கள் விரைவில் வெளியிடப்படும் என அமைச்சர் மேலும் தெரிவித்தார்.

இதனிடையே நாட்டில் இன்று நான்காவது நாளாக 800க்கும் அதிகமான Covid-19 சம்பவங்கள் பதிவாகியுள்ளன!

இன்று மட்டும் புதிதாக 862 சம்பவங்கள் பதிவு செய்யப்பட்டுள்ள வேளை, அவற்றுள் 860 உள்நாட்டில் பரவியவை.

புதிதாக ஒரு Cluster கண்டறியப்பட்டுள்ளது.

மேலும் மூன்று மரணங்கள் பதிவானதைத் தொடர்ந்து, மரண எண்ணிக்கை 193ஆக உயர்ந்துள்ளது.