← Back to list

தொடர்ந்து ஓரிலக்க எண்!

Jul 03, 2020

Covid-19 தொடர்பில் நாட்டில் இன்று 5 புதிய சம்பவங்கள் பதிவு செய்யப்பட்டன.

மேலும் 9 பேர் பூரண குணமடைந்துள்ளனர்.

அதனைத் தொடர்ந்து அத்தொற்றுக்காக இன்னமும் சிகிச்சை பெற்று வருவோரின் எண்ணிக்கை 81க்குக் குறைந்துள்ளது.

புதிதாக மரணம் ஏதும் பதிவாகவில்லை.

மொத்த மரண எண்ணிக்கை 121 ஆகவே உள்ளது.

விமான நிறுவனங்கள் பயண டிக்கெட் விலையை நடமாட்டக் கட்டுப்பாட்டு ஆணை அமலுக்கு வருவதற்கு முன் இருந்ததைப் போல் மறுசீரமைக்குமாறு கேட்டுக் கொள்ளப்படுகின்றன.

தற்காப்பு அமைச்சர் Datuk Seri Ismail Sabri Yaakob அவ்வாறு கேட்டுக் கொண்டுள்ளார்.

அதே சமயம் பள்ளிகள் மீண்டும் திறக்கப்படவிருப்பதால், மாணவர்கள், ஆசிரியர்கள் ஆகியோருக்கு சிறப்புக் கட்டணக் கழிவு வழங்குவது  குறித்து அரசாங்கம் விமான நிறுவனங்களுடன் பேசவிருப்பதாகவும் அவர் கூறினார். 

கடந்த ஜூன் 29 ஆம் தேதியில் இருந்து Covid-19 தொற்றைக் கண்டறிவதற்கான பரிசோதனைக்கு அரசாங்கம் கட்டணம் விதிப்பதாக சுகாதார அமைச்சு கூறியிருக்கிறது.

பரிசோதனையைப் பொருத்து உள்நாட்டினர் மற்றும் வெளிநாட்டினருக்கு வெவ்வேறான கட்டணம் விதிக்கப்படுகிறது.

அதிகாரத்துவ பணிகளுக்காகச் சென்று நாடு திரும்பும் அரசாங்க அதிகாரிகள், மாற்றுத் திறனாளிகள் உள்ளிட்ட சில தரப்பினருக்கு மட்டுமே Covid-19 தொற்றுக்கான பரிசோதனை இலவசமாக மேற்கொள்ளப்படுவதாக அமைச்சு விளக்கியது.

நாளை நடைபெறும் பஹாங், Chini சட்ட மன்ற இடைத் தேர்தலின் போது வாக்காளர்கள் அணுக்கமாகக் கண்காணிக்கப்படுவர் என சுகாதார அமைச்சு கூறியிருக்கிறது.

வாக்காளர்களின் உடல் வெப்பம் கூடுதலாக இருந்தால் அல்லது அவர்கள் உடல் நலம் குன்றியிருந்தால் சம்பந்தப்பட்டவர்கள் தனிமைப்படுத்தப்பட்டு உரிய நடவடிக்கைகள் எடுக்கப்படும் என அது கூறியது.

அதோடு வாக்காளர்கள் SOPயைப் பின்பற்றி தங்களுக்கு ஒத்துழைப்பு கொடுக்குமாறும் அமைச்சு கேட்டுக் கொண்டது.

நாளை தொடங்கி அடுத்த ஒரு வாரத்திற்கான எரிபொருள் விலை அறிவிக்கப்பட்டுள்ளது.

RON95 மற்றும் RON97 பெட்ரோல் விலை நான்கு சென் சரிந்து லிட்டருக்கு ஒரு ரிங்கிட் 65 சென்னுக்கும் ஒரு ரிங்கிட் 95 சென்னுக்கும் விற்கப்படும்.

டீசல் 2 சென் இறங்கி லிட்டருக்கு ஒரு ரிங்கிட் 84 சென்னாகிறது.

பிற செய்திகள்.....

சிலாங்கூர் Rawangங்கில் Datuk Seri பட்டத்தைக் கொண்ட வர்த்தகர் ஒருவர் கடத்தி கொலை செய்யப்பட்டதில் முக்கியச் சந்தேக நபராக இருந்த ஆடவரின் தடுப்புக் காவல் மேலும் 7 நாட்களுக்கு நீட்டிக்கப்பட்டுள்ளது.

-----

ஜொகூர் சுல்தான் மற்றும் பட்டத்து இளவரசர் குறித்து WhatAppப்பில் சிறுமைப்படுத்தும் கருத்துகளை வெளியிட்ட பணி ஓய்வு பெற்ற ஆடவர் ஒருவருக்கு ஐயாயிரம் ரிங்கிட் அபராதம் விதிக்கப்பட்டுள்ளது.

தொகுப்பு : சுகந்தமலர் முனியாண்டி