← Back to list

மித்ரா மனிதவள அமைச்சுக்கு மாற்றம் !

Jan 27, 2026

மித்ரா, பிரதமர் துறையிலிருந்து மனிதவள அமைச்சுக்கு அதிகாரப்பூர்வமாக மாற்றப்பட்டுள்ளது ! 

இம்மாதம் 14-ஆம் தேதி நடைபெற்ற அமைச்சரவைக் கூட்டத்தில் அம்முடிவு எட்டப்பட்டதாக, மனிதவள அமைச்சர் Datuk Seri R.ரமணன் தெரிவித்துள்ளார். 

இந்தியச் சமூகத்திற்கான திட்டங்களை ஒழுங்காகவும் ஒருங்கிணைந்த முறையிலும் பயனுள்ளதாகவும் முன்னெடுக்கச் செய்வதே, இந்த மாற்றத்தின் நோக்கமாகும் என அவர் கூறினார்.

--------- 

இதனிடையே, மித்ராவின் தர்ம மடானி திட்டத்தின் கீழ், முதல் கட்டமாக 155 ஆலயங்களுக்கு 3.1 மில்லியன் ரிங்கிட் வழங்கப்பட்டுள்ளதாக ரமணன் தெரிவித்துள்ளார் ! 

நாடு முழுவதும் உள்ள 1,000 பதிவு பெற்ற இந்துக் கோவில்களுக்கு, 20 மில்லியன்  ரிங்கிட் தர்மா மடானி ஒரு முறை நிதியுதவி வழங்கும் திட்டத்தை, பிரதமர் டத்தோஸ்ரீ அன்வார் இப்ராஹிம் முன்னதாக அறிவித்திருந்தார். 

இத்திட்டத்தின் வாயிலாக, தகுதியுள்ள ஒவ்வோர் ஆலயமும் தலா 20-ஆயிரம் ரிங்கிட்  நிதியுதவியைப் பெறும். 

----------- 

தைப்பூசம் மற்றும் சீனப் புத்தாண்டு நெருங்கிக் கொண்டிருக்கும் நிலையில், பினாங்கில் அத்தியாவசிய உணவுப் பொருட்களின் விலைகள் திடீரென உயர்ந்து வருவது குறித்து, அம்மாநில இந்து சங்கம் கவலை தெரிவித்துள்ளது ! 

அவ்வாறான புகார்களைப் பெற்றுள்ள அச்சங்கம், அதற்கு எதிராக நடவடிக்கை எடுக்கும்படி, உள்நாட்டு வாணிப, வாழ்க்கைச் செலவீன அமைச்சைக் கேடுக்கொண்டது. 

---------- 

மும்பை விமான நிலையத்தில் கடந்த ஞாயிற்றுக்கிழமை, நீண்ட காலமாக தேடப்பட்டு வந்த மலேசியாவின் முக்கிய குற்றவாளிகள் என கூறப்படும் மூவர் கைது செய்யப்பட்டுள்ளனர் ! 

இவர்கள், கடந்தாண்டு மார்சில், கிள்ளான் தாமான் செந்தோசாவில் நடந்த இரட்டைக் கொலை உள்ளிட்ட 80-க்கும் மேற்பட்ட வன்முறைச் சம்பவங்களில் தொடர்புடைய, மாபெரும் குற்றக் கும்பலின் முக்கிய உறுப்பினர்கள் என சந்தேகிக்கப்படுவதாக காவல்துறை தெரிவித்துள்ளது. 

மும்பையில் தற்போது பிடிபட்டுள்ள இந்த மூவரையும், மலேசியாவுக்கு நாடு கடத்துவதற்கான சட்ட ரீதியான மற்றும் அரசதந்திர நடவடிக்கைகள் துரிதப்படுத்தப்பட்டுள்ளன.