← Back to list

மலேசிய கிண்ணம்: காலிறுதிக்கு இலக்கு வைத்துள்ளோம்- PJ City FC!

Sep 15, 2021

பிரசித்திப் பெற்ற மலேசிய கிண்ணக் கால்பந்து போட்டியில் குறைந்தது காலிறுதி வரை செல்ல இலக்கு வைத்துள்ளது PJ City FC!

அதற்காக வீரர்கள் தயாராகி வருவதால் இன்று நடக்கவுள்ள குழு நிலை ஆட்டங்களுக்கான குலுக்கலில் தாங்கள் எந்த எதிர்ப்பார்ப்பையும் வைக்கவில்லை என அவ்வணி நிர்வாகி இராஜேந்திரன் கண்ணையா கூறியுள்ளார்.

"இந்த குலுக்கல் எப்படி அமைந்தாலும், எந்த அணியுடன் பட்டியலிடப்பட்டாலும் அதைச் சமாளிக்க PJ City தயாராக இருக்கின்றது. முந்தைய ஆட்டங்களில் பெரிய அணிகளுடன் விளையாடியிருக்கின்றோம், சிலவற்றில் தோல்வி கண்டாலும் அவ்வாட்டங்களில் எங்கள் வீரர்களின் ஆக்கரமிப்பு அதிகமாக இருந்தது. அதை வைத்து PJ City வீரர்களால் எந்த சவாலையும் எதிர்கொள்ள முடியும் என நாங்கள் நம்புகிறோம்" என்றார்.

இதனிடையே முழுக்க முழுக்க உள்நாட்டு ஆட்டக்காரர்களை மட்டுமே கொண்டு மலேசிய சூப்பர் லீக்கில் ஏழாம் இடத்தைப் பிடித்த தமதணியை இராஜேந்திரன் வெகுவாகப் பாராட்டினார்.

" ஏழாம் இடத்தைப் பிடித்திருப்பது என்னை பொறுத்தவரை மிகப் பெரிய வெற்றி. காரணம் முழுக்க முழுக்க உள்நாட்டு ஆட்டக்காரர்களை மட்டுமே வைத்து, இந்த அடைவு நிலையைப் பதிவுச் செய்துள்ளோம். இது எங்களுக்கொரு நம்பிக்கையைத் தந்துள்ளது" என அவர் கூறினார்.

வெளிநாட்டு ஆட்டக்காரர்கள் இன்றி மாநில அணிகளுக்கு சவால் கொடுக்கும் நிலையில் PJ City இருப்பதைத் தாம் பெருமையாகக் கருதுவதாக Rajendran சொன்னார்.