← Back to list

MySejahtera-வைப் பார்க்கவில்லையாம்; தடுப்பூசி போட வராததன் காரணம் என்ன?

Jun 15, 2021

நெகிரி செம்பிலானில் இன்னமும் அதிகமானோர் தேதி கொடுக்கப்பட்டும் தடுப்பூசி போட்டுக் கொள்ள வாரமல் இருக்கும் சம்பவங்கள் நடந்து கொண்டு தான் இருக்கின்றன.

அதற்கு பெரும்பாலும் அவர்கள் கூறும் சாக்கு MySejahtera-வைப் பார்க்கவில்லை என்பது தான் என்கிறார், மாநில ஆட்சிக் குழு உறுப்பினர் வீரப்பன் சுப்பிரமணியம்.

என்றாலும் தடுப்பூசி போட வர முடியாததற்குத் தவிர்க்க முடியாத சில காரணங்களும் இருப்பதாக அவர் சொன்னார்.

''பெரும்பாலும் வயதானவர்களிடம் விவேக கைப்பேசி இருப்பதில்லை, அதனால் MySejahtera-வில் கொடுக்கப்படும் தேதி அவர்களுக்குத் தெரியவில்லை.

இன்னும் சிலருக்குத் தேதி தெரிந்தாலும் போக்குவரத்து இல்லாத காரணத்தால் அவர்களால் தடுப்பூசி மையத்திற்கு வர இயலாமல் போகின்றது'' என்றாரவர்.

''ஒரு வேளை உங்களிடம் போக்குவரத்து வசதி இல்லாவிட்டால் தயவு செய்து உங்கள் தொகுதி சட்ட மன்ற உறுப்பினரையே, ஆட்சிக் குழு உறுப்பினர் யாரையாவது உதவிக்கு அழையுங்கள். அவர்கள் உங்களுக்கு உதவுவார்கள்''என்றார் வீரப்பன்.

இவ்வேளையில் தடுப்பூசி தேதிக்காக நீண்ட நாட்களாகக் காத்திருக்கிறோம் எனக் கூறுபவர்கள் சற்று பொருமை காக்குமாறு வீரப்பன் கேட்டுக் கொண்டார்.

இதனிடையே தேதி கொடுக்கப்பட்ட பிறகு தடுப்பூசி போட்டுக் கொள்ள ஒருவர் தடுப்பூசி மையத்திற்குச் செல்லவில்லை என்றால், அது தேசிய தடுப்பூசி திட்டத்தை பாதிக்கும் என்றும் அவர் கூறுகின்றார்.

அதனால் கூட்டு நோய் எதிர்ப்பு சக்தியை அடையும் இலக்கையும் நம்மால் அடைய முடியாது என்றாரவர்.

விளைவுகள் ஏதும் இருக்குமோ என்ற அச்சம் தேவையே இல்லை எனக் கூறிய அவர், தடுப்பூசி முற்றிலும் பாதுகாப்பானது என்றும் வலியுறுத்துகிறார்.

தாமும் இரு தடுப்பூசி டோகளையும் போட்டு முடித்துள்ளதாகவும், தமது உடல்நிலை எந்த விளைவுகளையும் காட்டாமல் சீராக இருப்பதாகவும் வீரப்பன் சொன்னார்.

நெகிரி செம்பிலானில் அதிகமான தடுப்பூசி மையங்கள் திறக்கப்பட்டிருந்தாலும், விரைவில் இன்னும் அதிகமான தடுப்பூசி மையங்களைத் திறக்க மாநில அரசு முடிவெடுத்திருக்கும் தகவலையும் வீரப்பன் வெளியிட்டார்.

இதனிடையே Kuala Pilahவிலுள்ள Felda Kepisசில் நடமாடும் truck தடுப்பூசி திட்டம் மேற்கொள்ளப்பட்டு வருவதாகவும், அப்பகுதியில் கிட்டத்தட்ட ஆயிரத்துக்கும் அதிகமானோருக்கித் தடுப்பூசி போட திட்டமிட்டுள்ளதாகவும் அவர் சொன்னார்.