← Back to list

மிக உயரிய பலி எண்ணிக்கை!

Jun 02, 2021

நாட்டில் புதிதாக 126 பேர் Covid-19 கிருமித் தொற்றுக்குப் பலியாகியிருக்கின்றனர்.

இதுவரை ஒரே நாளில் பதிவான மிக உயரிய எண்ணிக்கை அதுவாகும்.

இதனிடையே  நாடு முழுவதும் புதிதாக ஏழாயிரத்து 703 Covid-19 சம்பவங்கள் பதிவு செய்யப்பட்டுள்ளன.

சிலாங்கூரில் தொடர்ந்து மிக அதிகமாக ஈராயிரத்து 728 சம்பவங்கள் அடையாளம் காணப்பட்டுள்ளன. 

சீனத் தயாரிப்பிலான Covid 19 Sinovac தடுப்பூசியை அவசரத் தேவைக்குப் பயன்படுத்த உலக சுகாதார நிறுவனம் WHO அங்கீகாரம் வழங்கியிருக்கிறது.

தேசிய தடுப்பூசித் திட்ட ஒருங்கிணைப்பாளர் Khairy Jamaluddin அவ்வாறு தெரிவித்திருக்கிறார்.

WHOவின் அங்கீகாரம் அத்தடுப்பூசி பாதுகாப்பானது, ஆக்ககரமானது என மக்களுக்கு நம்பிக்கை ஊட்டும் வகையிலும் உத்தரவாதம் வழங்கும் வகையிலும் இருப்பதாக அவர் சொன்னார்.

12 மில்லியன் Sinovac தடுப்பூசி டோஸ்கள் ஜூலை மாத இறுதிக்குள் மலேசியாவை வந்தடையும் என நேற்று அறிவியல், தொழில்நுட்ப, புத்தாக்க அமைச்சருமான Khairy கூறியிருந்தது குறிப்பிடத்தக்கது. 

நாடு முழுவதும் இதுவரை ஒரு கோடியே 24 லட்சத்துக்கும் மேற்பட்டோர் தடுப்பூசி போட்டுக் கொள்ளத் தங்களைப் பதிந்து கொண்டுள்ளனர். 

சிலாங்கூரில் மிக அதிகமாக 32 லட்சத்துக்கும் அதிகமானோர் பதிவு செய்து கொண்டுள்ளனர்.

இவ்வேளையில், இதுவரை 30 லட்சத்துக்கும் மேற்பட்ட முதல் மற்றும் இரண்டாவது தடுப்பூசி டோஸ்கள் போடப்பட்டுள்ளன.

வங்கிகளிடம் இருந்து கடன் வாங்கியுள்ளவர்களில் Covid-19 பெருந்தொற்று காரணமாக வருமானம் பாதிக்கப்பட்டிருந்தால், கடன் தொகையைத் திருப்பிச் செலுத்துவதில் அவர்களுக்கு உதவிகள் வழங்கப்படும் என Bank Negara மீண்டும் கூறியிருக்கிறது.

இவ்வேளையில் B40 பிரிவைச் சேர்ந்தவர்கள் மூன்று மாத கால moratorium சலுகையைத் தேர்வு செய்யலாம் அல்லது ஆறு மாதங்களுக்குத் தங்களது தவணைப் பணத்தைக் குறைத்துக் கொள்ள தேர்வு செய்யலாம்.

நாட்டில் முழு முடக்கம் அமலில் இருப்பதைத் தொடர்ந்து சிலாங்கூர் மாநில அரசு ‘Pakej Kita Selangor’ உதவித் திட்டத்தை அடுத்த வாரம் அறிவிக்கவிருக்கிறது.

அதன் தொடர்பில் பல்வேறு விஷயங்கள் இன்னமும் விவாதிக்கப்பட்டு வருவதாக மாநில menteri besar தெரிவித்தார்.

இதனிடையே Covid-19 பரவலால் தாக்கத்தை எதிர்நோக்கியுள்ள மக்களுக்கு உதவும் பொருட்டு ஜொகூர் மாநில அரசு மூன்றாம் கட்ட பொருளாதார ஊக்குவிப்புத் திட்டத்தை விரைவில் அறிமுகப்படுத்தவிருக்கிறது.

நாளை தொடங்கி அடுத்த ஒரு வாரத்திற்கு RON97 பெட்ரோல் விலை 2 சென் அதிகரித்து லிட்டருக்கு 2 ரிங்கிட் 63 சென்னுக்கு விற்கப்படும்.

RON95 லிட்டருக்கு 2 ரிங்கிட் 5 சென்னாகவும் டீசல் லிட்டருக்கு 2 ரிங்கிட் 15 சென்னாகவும் நிலை நிறுத்தப்படுகிறது.