← Back to list

தினசரி பரிசோதனை எண்ணிக்கை அதிகரிக்கப்படும்!

Apr 28, 2020

தினசரி பரிசோதனை எண்ணிக்கை அதிகரிக்கப்படும்!

அடுத்த வாரம் தொடங்கி, நாட்டில் COVID-19 கோறனி நச்சில் தொற்றுக்கான தினசரி பரிசோதனை எண்ணிக்கையை 22 ஆயிரத்திற்கும் மேல் அதிகரிக்க முடியும்!

அதற்கான தானியங்கி இயந்திரங்களில் ஒன்று, KL-லிலுள்ள மருத்துவ ஆய்வு கழகத்திலும், மற்றொன்று Kota Kinabalu-விலுள்ள பொது மருத்துவ ஆய்வுக்கூடத்திலும் வைக்கப்படும் என சுகாதாரத் துறை தலைமை இயக்குநர் தெரிவித்துள்ளார்.

நடப்பில் நாளொன்றுக்கு 16 ஆயிரத்திற்கும் அதிகமான பரிசோதனைகள் மேற்கொள்ளப்பட்டு வருவதாக Datuk Seri Dr Noor Hisham Abdullah கூறினார்.

ஆரம்பத்தில் 23ஆக இருந்த COVID-19 சோதனை ஆய்வுக்கூடங்கள் எண்ணிக்கை தற்போது 43 அதிகரித்திருப்பதையும் அவர் சுட்டிக் காட்டினார்.

நேற்று நாட்டில் புதிதாக 40 பேர் மட்டுமே அக்கிருமித் தொற்றுக்கு ஆளானவேளை, 95 பேர் முழுமையாக குணமடைந்து வீடு திரும்பினர்.

இவ்வேளையில், ஒவ்வொரு முறையும் ரமலான் மாதத்தில் தேசிய ரத்த வங்கியில் ரத்தக் கையிருப்பு குறையும் என்பதால், ரத்த தானம் செய்ய அதிகமானோர் முன் வர வேண்டும் என்றும் Dr Noor Hisham கேட்டுக் கொண்டார்.

நாடு நடமாட்டக் கட்டுப்பாட்டு ஆணையின் கீழ் இருக்கும் இக்காலக்கட்டத்தில், பொது மக்கள் காலை பத்து மணி முதல் இரவு பத்து மணி வரை பொது மருத்துவமனை அல்லது கிளினிக்குகளில் ரத்த தானம் செய்ய அனுமதிக்கப்படுவதாக தற்காப்பு அமைச்சு முன்னதாக கூறியிருந்தது.

மற்றொரு நிலவரத்தில், மே 18ஆம் தேதி ஒரு நாள் மக்களவைக் கூட்டம் நடைபெறவுள்ள நிலையில், தடுப்பு நடவடிக்கைகள் எடுக்கப்பட வேண்டும் என்பதையும் Dr Noor Hisham வலியுறுத்தினார்.

பயண அனுமதி பெற வேண்டும்!

பொதுப் போக்குவரத்து சேவை வாயிலாக மாநிலங்களுக்கிடையே பயணிக்க, பொது மக்கள் காவல் துறையிடம் இருந்து அனுமதி அல்லது பயண பெர்மிட்டைப் பெற வேண்டும்.

எனவே, பயணங்களுக்கான டிக்கெட்டுகளை வாங்கும் முன்னரே, அந்த அனுமதியைப் பெற்று விடுமாறு போக்குவரத்து அமைச்சு வலியுறுத்தியிருக்கின்றது.

தொகுப்பு: சௌரியம்மாள் ராயப்பன்