← Back to list

UPSR, PT3 தேர்வுகள் ரத்து!

Apr 15, 2020

இவ்வாண்டுக்கான ஆறாம் ஆண்டு மாணவர்களுக்கான UPSR மற்றும் மூன்றாம் படிவ மாணவர்களுக்கான PT3 தேர்வுகள் ரத்து செய்யப்படுகின்றன.

இவ்வாண்டுக்கான SPM மற்றும் SVM தேர்வுகள் அடுத்தாண்டு முதல் காலாண்டுக்கு ஒத்தி வைக்கப்படுகின்றன.

ஆறாம் படிவ மாணவர்களுக்கான STPMமின் இரண்டாம் தவணைக்கான தேர்வு தேதி வரும் ஆகஸ்ட் மாதத்திற்கு மாற்றப்பட்டுள்ளது.

அதே சமயம் மூன்றாம் தவணைக்கான தேர்வு அடுத்தாண்டு முதல் காலாண்டில் நடத்தப்படும் என கல்வியமைச்சு அறிவித்துள்ளது.

பள்ளிகள் மீண்டும் திறக்கப்படுவதற்கு குறைந்தது இரு வாரங்களுக்கு முன் அதன் தொடர்பில் அறிவிப்பு வெளியிடப்படும்.

நடப்பு சூழ்நிலைக் கருத்தில் கொண்டும் சுகாதார அமைச்சு மற்றும் தேசிய பாதுகாப்பு மன்றம் ஆகியவற்றின் ஆலோசனையின் பேரிலும் முடிவு எடுக்கப்படும் என கல்வியமைச்சு கூறியது.

நாட்டிலுள்ள 13 சிறைச்சாலைக் கல்லூரிகள், நடமாட்டக் கட்டுப்பாட்டு ஆணையை மீறுவோரைக் கைது செய்து சிறை வைக்கப் பயன்படுத்தப்படவுள்ளன. 

அது அரசாங்கப் பதிவேட்டில் குறிப்பிடப்பட்டு விட்டதாக தற்காப்பு அமைச்சு கூறியது. 

MCOவைப் பின்பற்றாதவர்களின் எண்ணிக்கை அதிகமாக இருப்பதை அடுத்து அவ்வாறு செய்யப்படுவதாக அது தெரிவித்தது.  

நாட்டில் Covid-19னுக்குப் பலியானோரின் எண்ணிக்கை 83 ஆக அதிகரித்துள்ளது. 

ஆகக் கடைசியாக மேலும் ஒருவர் அக்கிருமித் தொற்றால் மரணமடைந்துள்ளார். 

புதிதாக 85 சம்பவங்கள் கண்டறியப்பட்டுள்ளன.

மார்ச் 14 ஆம் தேதிக்குப் பிறகு நூறு சம்பவங்களுக்கும் குறைவாகப் பதிவாவது இதுவே முதல் முறை. 

மொத்த சம்பவங்களின் எண்ணிக்கை ஐயாயிரத்து 72 ஆக உயர்ந்துள்ளது.

கிருமி நாசினி அறை, பெட்டி, சுரங்கம் என அதனுள் நுழைந்து கடந்து செல்லும் ஒருவர் மீது கிருமி நாசினி தெளிக்கும் முறை Covid-19னைக் கட்டுப்படுத்த உதவும் என்பதற்கு இதுவரை ஆதாரம் இல்லை.

அம்முறையில் பயன்படுத்தப்படும் ரசாயனம் வாய், கண்கள், தோல் ஆகியவற்றுக்கு பாதிப்பை ஏற்படுத்தலாம் என சுகாதாரத் தலைமை இயக்குனர் சொன்னார்.

நாட்டில் Covid-19 சம்பவங்கள் அதிகம் பதிவாகி சிவப்புப் பகுதிகள் பட்டியலில் இடம் பெற்றுள்ள இடங்களின் எண்ணிக்கை 27 ஆக அதிகரித்துள்ளது. 

ஆகக் கடைசியாக, ஜொகூர், Muar அப்பட்டியலில் சேர்ந்துள்ளது.

JB Pandan மொத்த வியாபாரச் சந்தையில் நபர் ஒருவருக்கு Covid-19 தொற்றியிருப்பதாகப் பரவியுள்ள தகவலை மாநில சுகாதாரத்துறை மறுத்துள்ளது.

Sebenarnya.my அகப்பக்கத்தில் நீங்கள் பெறும் தகவல் உண்மையா இல்லையா என்பதைச் சரிபார்த்துக் கொள்ளலாம்.

தொகுப்பு : சுகந்தமலர் முனியாண்டி