← Back to list

ஆசிரியர்கள் இல்லாத உலகம், ஆணிவேர் அற்ற ஆலமரம்!

May 16, 2019

அந்தளவுக்கு ஆசிரியர் பணி என்பது ஒரு சமுதாயத்தையே மாற்றக்கூடிய வலிமைப் பெற்றது.

அம்மாற்றத்தை மாற்றுத் திறனாளி மாணவர்களிடையே கொண்டு வர முடியும் என்ற நம்பிக்கையோடு 8 ஆண்டுகளாக ஆசிரியராக பணிப் புரிந்து வருகின்றார் விக்னேஸ் ராமச்சந்திரன்.

மலாக்கா Bukit Lintang தமிழ்ப்பள்ளி ஆசிரியரான விக்னேஸ், சிறப்புக் கல்வி (Pendidikan Khas) வாயிலாக மாணவர்களின் அன்றாட வாழ்க்கை மற்றும் பொது இடத்தில் அவர்கள் எப்படி நடந்துக் கொள்ள வேண்டும் என்பதையும் கற்றுக் கொடுப்பதுதான் தமது முக்கியப் பணிகளில் ஒன்று என தெரிவித்தார்.

வகுப்பில் படித்ததை எளிதில் மறந்து விடுவது, படிப்பில் நாட்டம் இல்லாதது போன்ற சில சவால்களை சமாளிக்க, சம்பந்தப்பட்ட மாணவர்களுக்கு விளையாட்டு அடிப்படையில் கல்வி போதனைகள் மேற்கொள்ளப்படும் என்றும் ஆசிரியர் விக்னேஸ் விவரித்தார்.

அவ்வாறு செய்யும் போது, கல்விக்கான சூழல்களும் மாறுபடும் என்றாரவர்; உதாரணத்திற்கு வகுப்பறையை தவிர்த்து, பள்ளித் திடல், நூலகம், படிக்கட்டுகள் போன்ற வெவ்வேறான இடங்களில் Pendidikan Khas மாணவர்களுக்கு கல்வி கற்பிக்கப்படும் என அவர் கூறினார். 

இதனிடையே, பள்ளிகளில் Pendidikan Khas கல்விப் பயிலும் மாணவர்கள் மாநில மற்றும் தேசிய அளவிலான போட்டிகளில் பங்கேற்கும் போது அது அவர்களுக்கு வித்தியாசமான அனுபவத்தை கொடுக்கும் என்றும் ஆசிரியர் விக்னேஸ் தெரிவித்தார்.

மொழி அடிப்படையிலான விழாக்கள் அல்லது போட்டிகளில் Pendidikan Khas கல்வி மேற்கொள்ளும் மாணவர்களுக்கென, கவிதை ஒப்புவித்தல், தனிப் பாடல் அல்லது குழுப் பாடல் பாடுவது உள்ளிட்ட வாய்ப்புகள் வழங்கப்பட்டால் மாணவர்கள் நிச்சயம் மிளிர்வார்கள் என்றும் அவர் நம்பிக்கை தெரிவித்தார்.

பள்ளியின் ஹாக்கி பயிற்றுநராகவும் பொறுப்பு வகிக்கும் ஆசிரியர் விக்னேஸ் தமது பள்ளியைச் சேர்ந்த Pendidikan Khas மாணவர்களுக்கு, முறையான பயிற்சிகள் கொடுத்து, அவர்களை வட்டார, மாநில மற்றும் தேசிய ரீதியிலான போட்டிகளுக்கும் அழைத்துச் சென்றிருப்பதை குறிப்பிட்டார்.

அவரது ஆசிரியர் பணி மேலும் சிறக்க வாருங்கள் நாமும் அவரை வாழ்த்துவோமே!

ஒவ்வொரு மனிதனின் கல்விக்கும் அஸ்திவாரமாய் திகழும் அனைத்து ஆசிரியர்களுக்கும் இனிய ஆசிரியர் தின வாழ்த்துகள்!