← Back to list

உழைக்கும் மனிதனின் உறக்கம் இனிமையானது!

Apr 30, 2019

தோட்டப் பாட்டாளியின் மகன் பாட்டாளியாகவே இருக்க வேண்டியதில்லை என்ற விதியை மாற்றியோர் பலருண்டு!

அவர்களில் ஒருவராக, கடும் உழைப்பின் பயனாக வாழ்க்கை தரத்தையே மாற்றியமைக்கலாம் என்பதை நிரூபித்துள்ளார் பேராக்கைச் சொந்த ஊராக கொண்ட டத்தோ செல்வம் கிரிஷ்ணன்.

அதுவும் இந்தியர்கள் மிகக் குறைவாக ஈடுபட்டுள்ள எண்ணெய் மற்றும் எரிவாயு (Oil&Gas) தொழில்துறையில் சாதித்து வரும் இவரது வாழ்வில் திருப்புமுனையாக அமைந்தது தோட்டப்புற வாழ்க்கையும், அங்கு சில காலம் செய்த வேலையும்தான் என தெரிவித்துள்ளார்.

இடைநிலைப்பள்ளி கல்வியை முடித்து, தந்தையின் ஆலோசனைக்கு ஏற்ப தோட்டத்தில் 500 ரிங்கிட் மாத சம்பளத்திற்கு வேலையை தொடங்கிய டத்தோ செல்வம், பின்னர் வாழ்க்கை தரத்தை மாற்ற வேண்டும் என்ற நோக்கில் சிங்கப்பூருக்கு வேலைத் தேடிச் சென்றார்.

எனினும், சிங்கப்பூரிலும் அவருக்கு சவால் நிறைந்த வாழ்க்கைதான்.

அதனை சமாளிக்க பகுதி நேர டிப்ளோமா கல்வியை மேற்கொண்ட அவர், ஆங்கிலப் மொழித் திறமையை வளர்த்துக் கொள்ள அதற்கான வகுப்புகளையும் மேற்கொண்டார்.

சில ஆண்டுகள் சிங்கப்பூரில் வேலை செய்து அனுபவம் தேடிய டத்தோ செல்வம் பின்னர் மலேசியாவுக்கு திரும்பி சொந்த நிறுவனம் தொடங்க பல முயற்சிகள் மேற்கொண்டு இறுதியில் அதில் வெற்றியும் கண்டார்.

அவரது வெற்றியின் உச்சமாக 2016ஆம் ஆண்டுக்கான இளம் இந்தியர் தொழில்முனைவர் விருதையும் அவர் கைப்பற்றினார்.

தமது இந்த உழைப்புக்கு இன்றும் முன்னோடியாக இருப்பவர், முன்பு தோட்டப்புறத்தில் ரப்பர் மரம் சீவும் தொழிலாளியாக இருந்த தனது தந்தைதான் என்றும் கூறினார் டத்தோ செல்வம்.

தோட்டப்புறத்தில் பிறந்து, வளர்ந்து தற்போது சிலாங்கூர் Shah Alamமில் சொந்த எண்ணெய் மற்றும் எரிவாயு நிறுவனம் நடத்தி வரும் டத்தோ செல்வம் நாளை கொண்டாடப்படவுள்ள உலகத் தொழிலாளர் தினத்தை முன்னிட்டு தமது அனுபவத்தை ராகா செய்திப் பிரிவுடன் பகிர்ந்துக் கொண்டார்.

நேயர்கள் அனைவருக்கும் உலகத் தொழிலாளர் தின வாழ்த்துகள்!