← Back to list

2022 சூப்பர் லீக்கிற்கு இலக்கு வைத்துள்ளார் நெகிரி செம்பிலானின் புதிய பபயிற்றுனர் கே தேவன்!

Dec 02, 2020

மலேசிய Premier லீக்கிலிருந்து, 2022 சூப்பர் லீக் கால்பந்தாட்டத்திற்கு நெகிரி செம்பிலான் கால்பந்து அணியைக் கொண்டுச் செல்ல வேண்டும்!

அதுவே தமது இலக்கு எனக் கூறியுள்ளார் அவ்வணியின் புதிய தலைமை பயிற்றுனர் கே தேவன்.

ஏற்கனவே 2003 மற்றும் 2015ஆம் ஆண்டுகளில் அவ்வணி பயிற்றுனராக இருந்துள்ள அவர், மூன்றாவது முறையாக நெகிரி செம்பிலான் பயிற்றுனராக இவ்வாரம் அறிவிக்கப்பட்டார்.

தமது அந்நியமனம் குறித்து ராகா செய்தி பிரிவிடம் பேசிய அவர் மீண்டும் தனது முன்னாள் கிளப்புக்கே திரும்புவது மிகுந்த மகிழ்ச்சியயைத் தந்துள்ளதாகச் சொன்னார்.

முதலில் அணி வீரர்களுடன் நன்கு பழகி அவர்களைப் புரிந்து கொண்ட பிறகு தனது திட்டங்களை அவ்வணியில் அமுல்படுத்தப் போவதாக தேவன் சொன்னார்.

வலுமிக்க அணியை அமைக்க வேண்டும் எனபதே தமது முதன்மை இலக்கு என தெரிவித்த அவர், அதற்காக சில உள்ளூர் மற்றும் வெளிநாட்டு வீரர்களை அணிக்குக் கொண்டு வரத் திட்டமிட்டுள்ளதாகவும் கூறினார்.

தமது திட்டம் சரியாக அமைந்தால், நெகிரி செம்பிலான் அணியின் எதிர்காலத்தை அடுத்தக் கட்டத்திற்குக் கொண்டு செல்ல முடியும் என அவர் நம்பிக்கை தெரிவித்தார்.

தனது ஆழ்ந்த அனுபவங்களினால் தாம் பயிற்றுவித்து வந்த எல்லா கிளப்புகளை வெற்றியெனும் சிகரத்திற்கு தேவன் இட்டுச் சென்றுள்ளார் என்றால் மிகையாகாது.

நெகிரி செம்பிலானை 2003 ஆம் ஆண்டு FA கிண்ணத்தை வெல்ல வைத்த அவர், 2005/2006 பருவத்தில் சூப்பர் லீக்கை வாகை சூடவும் உதவியதும் குறிப்பிடத்தக்கது.