← Back to list

MCOவை மீண்டும் அமல்படுத்தத் திட்டமில்லை!

Oct 06, 2020

அரசாங்கம் நாடு முழுவதும் நடமாட்டக் கட்டுப்பாட்டு ஆணையை மீண்டும் அமல்படுத்தத்  திட்டமிடவில்லை.

Covid-19 சம்பவங்கள் அதிகம் பதிவாகும் பகுதிகளில் நடமாட்டக் கட்டுப்பாட்டு ஆணை கடுமையாக்கப்படும் என பிரதமர் Tan Sri Muhyiddin Yassin அறிவித்திருக்கிறார்.

இதனிடையே, ஏழு அமைச்சர்களும் ஆறு துணையமைச்சர்களும் தங்களைத் தனிமைப்படுத்திக் கொண்டுள்ளதாக அவர் சொன்னார்.

உத்தரவை மீறுவோருக்கு எதிராக நடவடிக்கை எடுக்கப்படும்.

மற்றொரு நிலவரத்தில், Covid-19 சம்பவங்கள் அதிகம் பதிவாகி வருவது குறித்து பதற்றமடைய வேண்டாம் என பிரதமர் பொதுமக்களைக் கேட்டுக் கொண்டார்.

நாட்டில் புதிதாக 691 பேர் Covid-19 கிருமித் தொற்றுக்கு ஆளாகியிருக்கின்றனர்.

மலேசியாவில் Covid-19 பரவத் தொடங்கியதில் இருந்து பதிவு செய்யப்பட்ட மிக உயரிய எண்ணிக்கை அதுவாகும். 

பதிவான 691 சம்பவங்களில் 688 உள்நாட்டில் பரவியவை.

கெடாவில் மிக அதிகமாக 397 சம்பவங்கள் பதிவாகியுள்ளன.

அடுத்து மிக அதிகமாக சபாவில் 219 சம்பவங்களும் சிலாங்கூரில் 38 சம்பவங்களும் அடையாளம் காணப்பட்டுள்ளன.

புதிதாக நான்கு மரணங்கள் பதிவாகி மொத்த மரண எண்ணிக்கை 141 ஆக அதிகரித்துள்ளது. 

பேராவில், Batu சபாவில் Ramai-Ramai என இரு புதிய clusterகள் கண்டறியப்பட்டுள்ளன.

சபாவிலிருந்து, தீபகற்பம், சரவாக், Labuanனுக்குச் செல்ல அரசாங்கம் தடை விதித்துள்ளது.

அது வரும் 12 ஆம் தேதி தொடங்கி 25 ஆம் தேதி வரை அமலில் இருக்கும்.

அவசரத் தேவைகள், அத்தியாவசிய சேவைகள் மற்றும் காவல் துறையின் ஒப்புதல் தேவைப்படும் சில தரப்புகளுக்கு மட்டுமே விலக்கு அளிக்கப்படும் என பாதுகாப்பு விவகாரங்களுக்கான மூத்த அமைச்சர் Datuk Seri Ismail Sabri Yaakob தெரிவித்தார்.

மீட்சியை நோக்கிய நடமாட்டக் கட்டுப்பாட்டு ஆணையை மீறியதற்காக நேற்று நாடு முழுவதும் 363 பேர் கைது செய்யப்பட்டனர். 

அவர்களில் மிக அதிகமான 144 பேர் பொது இடங்களில் சுவாசக் கவசங்களை அணியாததற்காகக் கைதானவர்கள் என தற்காப்பு அமைச்சு அறிக்கை வழி தெரிவித்தது.

Covid-19 பரவலைத் தடுக்கும் முன்னெச்சரிக்கை நடவடிக்கை சுகாதாரத் தலைமை இயக்குனர் Tan Sri Dr Noor Hisham Abdullah தம்மைத் தாமே தனிமைப்படுத்திக் கொண்டிருக்கிறார். 

Covid-19 தொற்று உறுதிப்படுத்தப்பட்ட சமய விவகாரங்களுக்கான பிரதமர் துறை அமைச்சர் Datuk Dr Zulkifli Mohamad Al-Bakri கடந்த மூன்றாம் தேதி நடைபெற்ற தேசிய பாதுகாப்பு மன்றக் கூட்டத்தில் கலந்து கொண்டவர்களில் Noor Hishamமும் அடங்குவார்.

தம்மைத் தனிமைப்படுத்திக் கொண்டிருக்கும் காலக் கட்டத்தில் செய்தியாளர்கள் இன்றி அவர் வீட்டில் இருந்தே அவ்வப்போது செய்தியாளர் சந்திப்பை நேரலையாக நடத்துவார் எனத் தெரிவிக்கப்பட்டுள்ளது. 

Covid-19 சம்பவங்கள் அதிகம் பதிவாகி வரும் சூழ்நிலையில், பள்ளிக்கு வரும் மாணவர்களின் எண்ணிக்கை குறைவாக இருந்தால், பள்ளி நிர்வாகங்களுக்கு நெருக்குதல் கொடுக்க வேண்டாம்.

தேசிய ஆசிரியர், பணியாளர் சங்கம் NUTP, மாநில கல்வித் துறைகளையும்  மாவட்ட கல்வி அலுவலகங்களையும் அவ்வாறு கேட்டுக் கொண்டுள்ளது. 

தங்களது பிள்ளைகளை அனுப்ப பல பெற்றோர் தயங்கி வருவதால், நிலைமையைப் புரிந்து கொண்டு அனுசரணையாக நடந்து கொள்ளுமாறு அவ்விரு தரப்புகளையும் வலியுறுத்தியது.

Sungai Semenyih நீர் சுத்திகரிப்பு ஆலை மீண்டும் இயங்கத் தொடங்கியுள்ள நிலையில், நீர் விநியோகத் தடையால் பாதிக்கப்பட்ட பகுதிகளுக்கு இன்று நள்ளிரவு தொடங்கி நீர் கட்டங் கட்டமாக விநியோகிக்கப்படும். 

எனினும் பாதிக்கப்பட்ட பகுதிகள் மூன்று முக்கியக் குழுக்களாகப் பிரிக்கப்பட்டுள்ளதால் எல்லா பகுதிகளிலும் நீர் விநியோகம் 9 ஆம் தேதிக்குள் முழுமையாகச் சீரடைந்து விடும் என எதிர்பார்க்கப்படுவதாக Air Selangor தெரிவித்தது.