← Back to list

விசாரணை தொடரப்படுகிறது!

Sep 24, 2020

நாட்டில் புதிதாக 71 பேருக்கு Covid-19 பீடித்திருப்பது உறுதிப்படுத்தப்பட்டுள்ளது.

அவற்றில் 69 சம்பவங்கள் உள்நாட்டில் பரவியவை.

சபாவில் மிக அதிகமான 63 சம்பவங்கள் அடையாளம் காணப்பட்டுள்ளதாக சுகாதார அமைச்சு தெரிவித்திருக்கிறது.

புதிய cluster ஏதும் இல்லை.

மொத்த மரண எண்ணிக்கை 133 ஆகவே இருக்கிறது.

மீட்சியை நோக்கிய நடமாட்டக் கட்டுப்பாட்டு ஆணையை மீறியதற்காக நேற்று நாடு முழுவதும் 137 பேர் கைது செய்யப்பட்டனர்.

அவர்களில் 111 பேருக்கு தண்டம் விதிக்கப்பட்டதாக தற்காப்பு அமைச்சு தகவல் வெளியிட்டுள்ளது.

துருக்கியில் இருந்து நாடு திரும்பிய பின் தம்மைத் தாமே தனிமைப்படுத்திக் கொள்ளத் தவறிய தோட்டத் தொழில், மூலப் பொருள் அமைச்சர் மீதான விசாரணை தொடரப்படுவதாகக் காவல் துறை தெரிவித்திருக்கிறது.

தேசிய சட்டத்துறை அலுவலகத்தின் உத்தரவின் கீழ் விசாரணை தொடரப்படுகிறது.

விசாரணைக்கு உதவ மேலும் சிலர் அழைக்கப்படுவர் என்றும் Bukit Aman கூறியது.

சபா சட்டமன்றத் தேர்தலையொட்டிய முன் கூட்டிய வாக்களிப்பின் போது, ராணுவப் படையினர் மத்தியில் Covid-19 பரவல் ஏற்பட்டதாகக் கூறப்படுவதை ராணுவப்படை மறுத்திருக்கிறது.

மையில் விரலை விட்டு எடுத்த பின் அக்கிருமித் தொற்று பரவியதாக சமூக வலைத்தளத்தில் பரவியுள்ள தகவல் உண்மையில்லை என அது தெளிவுபடுத்தியது.

Merotai சட்ட மன்றத் தொகுதியில் வாக்காளர்களுக்குப் பணம் கொடுத்ததாக சமூக வலைத்தளங்களில் பரவியுள்ள தகவலை சபா மக்கள் Harapan கட்சி மறுத்துள்ளது.

அச்செய்தி உண்மையில்லை.

பொறுப்பற்ற தரப்பினர் வேண்டுமென்றே கிளப்பியுள்ள அரசியல் யுக்தி அதுவென அக்கட்சி விளக்கியது.

வரும் சனிக்கிழமை நடைபெறும் மாநில சட்ட மன்றத் தேர்தலில் Merotai தொகுதியில் ஆறு முனைப் போட்டி நிலவுகிறது.