← Back to list

நடவடிக்கையில் இருந்து தப்ப முடியாது!

Aug 24, 2020

நாட்டில் புதிதாக ஏழு Covid-19 சம்பவங்கள் பதிவு செய்யப்பட்டுள்ளன.

அவற்றில் 5 உள்நாட்டில் பரவியதாகும்.

அவை அனைத்தும் சரவாக்கில் பதிவாகியுள்ளன.

மரண எண்ணிக்கையில் மாற்றமில்லை.

புதிய cluster ஏதும் பதிவு செய்யப்படவில்லை என சுகாதாரத் தலைமை இயக்குனர் தெரிவித்தார்.

Covid-19 பரவலைக் கட்டுப்படுத்துவதில் அரசாங்கம் நிர்ணயித்துள்ள தர செயல்பாட்டு நடைமுறை SOPயை மீறுவோர் எவராக இருந்தாலும் சம்பந்தப்பட்டவர்கள் நடவடிக்கையில் இருந்து தப்ப முடியாது.

பிரமுகர்களும் அதில் விதி விலக்கு அல்ல என சுகாதாரத் துணையமைச்சர் மீண்டும் நினைவுறுத்தியுள்ளார்.

நாட்டுத் தலைவர் உட்பட மலேசியர்கள் அனைவரும் சட்டத்திற்கு உட்பட்டு நடக்க வேண்டியது மிக அவசியம்.

அரச மலேசிய காவல் துறை உள்ளிட்ட அதிகாரத்துவ தரப்புகள் மேற்கொள்ளும் விசாரணையைப் பொருத்து எவருக்கு வேண்டுமானாலும் கடும் தண்டனை விதிக்கப்படலாம் என அவர் எச்சரித்தார்.

Covid-19னைக் குணப்படுத்த உதவும் எனக் கூறி ரஷ்யா தயாரித்துள்ள தடுப்பூசி மீதான ஆகக் கடைசி அறிக்கைக்காகக் காத்திருப்பதாக சுகாதார அமைச்சு தெரிவித்திருக்கிறது.  

இதுவரை கிடைத்த அறிக்கையின் படி அத்தடுப்பூசி இன்னும் பதிவு செய்யப்படவில்லை.

அதோடு அத்தடுப்பூசி மூன்றாம் கட்ட சோதனையில் இருப்பதாக அமைச்சு விளக்கியது.

மீட்சியை நோக்கிய நடமாட்டக் கட்டுப்பாட்டு ஆணையை மீறியதற்காக நேற்று நாடு முழுவதும் 515 பேர் கைது செய்யப்பட்டனர்.

அவர்களில் 440 பேருக்கு தண்டம் விதிக்கப்பட்டது.

69 பேர் தடுத்து வைக்கப்பட்டனர்.

அறுவர் உத்தரவாதத்தில் விடுவிக்கப்பட்டதாக தற்காப்பு அமைச்சு தகவல் வெளியிட்டுள்ளது.

பேரா, Slim சட்ட மன்றத் தொகுதி இடைத் தேர்தலை முன்னிட்டு 260க்கும் மேற்பட்ட காவல் வீரர்கள் நாளை முன் கூட்டியே வாக்களிக்கின்றனர்.

வாக்களிப்பு நெடுகிலும் கூடல் இடைவெளியைக் கடைப்பிடித்தல், சுவாசக் கவசம் அணிதல், கிருமி நாசினித் திரவத்தைப் பயன்படுத்துதல், உடல் வெப்பத்தைப் பரிசோதித்தல் உள்ளிட்ட SOP பின்பற்றப்படும் என தேர்தல் ஆணையம் கூறியது.

Slim இடைத் தேர்தல் வரும் 29 ஆம் தேதி சனிக்கிழமை நடைபெறுகிறது.

கொரோனா பாதிப்பிலிருந்து பிரபல பின்னணிப் பாடகர் S. P பாலசுப்ரமணியம் மீண்டு விட்டதாக ஊடகங்களில் தகவல் வெளிவந்துள்ளது குறித்து அவரது மகன் விளக்கமளித்துள்ளார்.

தமது தந்தையின் உடல் நலன் பற்றி தமக்குதான் முதலில் தெரிய வரும் என்றும் பிறகுதான் அத்தகவலைச் சமூகவலைத்தளங்களில் தாம் வெளியிட்டு வருவதாகவும் SP Charan தெரிவித்துள்ளார்.

தமது தந்தையின் உடல் நிலையில் பேரளவிலான மாற்றம் ஏதும் இல்லை எனக் குறிப்பிட்ட அவர், வதந்திகளை நம்ப வேண்டாம் எனக் கேட்டுக் கொண்டார்.