← Back to list

நஜிப் விவகாரம் ; இன்னும் வேறு ஏதும் திட்டங்கள் இல்லை !

Dec 22, 2025

வீட்டுக் காவலுக்கான Datuk Seri Najib Razak-கின் மனு நிராகரிக்கப்பட்ட பிறகு, மாற்றுத் திட்டங்கள் குறித்து இன்னும் எந்த முடிவும் எடுக்கப்படவில்லை ! 

ஆனால் புதிய மன்னிப்பு மனு தாக்கல் செய்வது உள்ளிட்ட பல்வேறு சட்ட நடவடிக்கைகளை மேற்கொள்ளலாம் என, அந்த முன்னாள் பிரதமரின் வழக்கறிஞர் தெரிவித்துள்ளார். 

எனினும், தற்போதைக்கு, SRC International வழக்கில் எஞ்சிய சிறைத் தண்டனையை வீட்டில் அனுபவிக்க அனுமதி கோரி தாக்கல் செய்யப்பட்ட மனுவை நிராகரித்த கோலாலம்பூர் உயர்நீதிமன்றத் தீர்ப்புக்கு எதிராக, தாம் மேல்முறையீடு செய்யவுள்ளதாக அவர் கூறினார்.

---------- 

மற்றொரு நிலவரத்தில், மதியிறுக்கம் கொண்ட Zayn Rayyan-னை புறக்கணித்த குற்றச்சாட்டில் விதிக்கப்பட்ட, ஐந்து ஆண்டு சிறைத் தண்டனையை நிறுத்தி வைக்க, அவனது தாய் தாக்கல் செய்த மனுவின் தீர்ப்பை, உயர்நீதிமன்றம் நாளை அறிவிக்கும் !  

அந்த தாய், மதியிறுக்கம் கொண்ட தனது மற்றொரு குழந்தையை பராமரிக்க வேண்டிய அவசியம் காரணமாக, அந்த மனுவை தாக்கல் செய்துள்ளார்.  

2023-ஆம் ஆண்டில் காணாமல் போனதாகக் கூறப்பட்ட, அப்போது 6 வயதாக இருந்த Rayyan, அதே ஆண்டு டிசம்பரில், சிலாங்கூர் Damansara Damai குடியிருப்புப் பகுதியில், உயிரிழந்த நிலையில் கண்டெடுக்கப்பட்டான்.  

---------

2026 தைப்பூசத்தை முன்னிட்டு, பினாங்கு இந்து அறப்பணி வாரியம், ஒரு சிறப்பு போக்குவரத்துச் சேவையை அறிவித்துள்ளது !  

அதாவது, தண்ணீர்மலை ஸ்ரீ பாலதண்டாயுதபாணி தேவஸ்தானுடன் இணைந்து, மூத்த குடிமக்கள் மற்றும் மாற்றுத் திறனாளி பக்தர்களுக்காக, மலையில் உள்ள முருகன் கோவிலுக்கு பாதுகாப்பான போக்குவரத்து வசதியை அது ஏற்பாடு செய்துள்ளது.  

---------- 

பினாங்கில், 30 ஆண்டு கால பழமையான மரமொன்று விழுந்ததில், இருவர் காயமடைந்ததை அடுத்து, அங்கு அடிக்கடி ஆய்வு நடவடிக்கைகள் மேற்கொள்ளப்படும் எனக் கூறி, பினாங்கு தீவு மாநகர் மன்றம் உறுதியளித்துள்ளது ! 

அழுகிய வேர்கள் மற்றும் கனமழை காரணமாக, அம்மரம் முறிந்து விழுந்ததை அதிகாரிகள் உறுதிப்படுத்தியதை அடுத்து, அம்மன்றம் அவ்வாறு கூறியது. 

---------- 

இந்தோனேசியாவில் உள்ள நெடுஞ்சாலை ஒன்றில், பேருந்து கவிழ்ந்து விபத்துக்குள்ளானதில், குறைந்தது 16 பேர் மரணமடைந்துள்ள வேளை, பலர் காயமடைந்ததாக, அந்நாட்டு அதிகாரிகள் தெரிவித்துள்ளனர் !