← Back to list

தீ விபத்து; 270 வீடுகள் வசிக்க பாதுகாப்பானவை !

Apr 08, 2025

சிலாங்கூர் Putra Heights எரிவாயு குழாய் தீ விபத்தைத் தொடர்ந்து, தற்போது 270 வீடுகள் வசிப்பதற்குப் பாதுகாப்பானவை என உறுதிப்படுத்தப்பட்டுள்ளன. 

அதில் பாதிப்படைந்த 571 வாகனங்களில், 88 வாகனங்கள் 50 விழுக்காட்டுக்கும் அதிகமாக சேதமடைந்ததாக, மாநில காவல்துறை தலைவர் Datuk Hussein Omar Khan தெரிவித்துள்ளார். 

151 வாகனங்களில் எந்தவொரு சேதமும் ஏற்படவில்லை என அவர் குறிப்பிட்டார். 

அச்சம்பவம் குறித்து காவல்துறைக்கு 675 புகார்கள் கிடைக்கப்பெற்றன. 

186 வாக்குமூலங்களும் பதிவு செய்யப்பட்டன. 

-------- 

இவ்வேளையில், அச்சம்பவத்தில், மதிப்புமிக்க பொருட்கள் இழப்பு ஏற்பட்டதற்கான எந்த புகாரும் கிடைக்கவில்லை. 

அப்பகுதியில் 120 காவல் வீரர்கள், 24 மணி நேர பாதுகாப்பு சேவையை வழங்கி வருகின்றனர்.  

அந்த வெடிப்பால் உயிரிழப்பு ஏற்பட்டதாகக் கூறப்படுவதை, PDRM மறுத்துள்ளது. 

அத்தகைய புகார்கள் எதுவும் பெறப்படவில்லையென அது சொன்னது. 

--------- 

அதே சமயம், அந்த தீ விபத்தால், எட்டாயிரத்துக்கும் மேற்பட்ட குடியிருப்பு மற்றும் வணிக வளாகங்களும், 300 தொழிற்சாலைகளும் பாதிக்கப்பட்டுள்ளன.  

நான்கு மின் நிலையங்களும் பாதிக்கப்பட்டன.  

--------  

இதனிடையே, அத்தீவிபத்து தொடர்பான விசாரணை அறிக்கை, முதலில் எதிர்பார்த்ததை விட முன்னதாகவே முடிக்கப்படும் என எதிர்பார்க்கப்படுகிறது. 

தொழில்நுட்ப புலனாய்வுக் குழு தீவிர விசாரணையில் ஈடுபட்டு வருவதால், முன்னதாக கூறப்பட்ட இரு வாரக் காலத்தை விட,  அவ்வறிக்கை முன்பே, முடிக்கப்படும் என காவல்துறை கூறியது. 

------- 

மற்றொரு நிலவரத்தில், அங்குள்ள எரிவாயு குழாய் திட்டம் தொடர்பான அனைத்து வேலைகளும், அதிகாரப்பூர்வ அனுமதிகளுடன் நடைபெற்றதாக மாநில ஆட்சிக்குழு உறுப்பினர் தெரிவித்துள்ளார். 

அந்த வேலைகள் சட்டவிரோதமாக நடைபெற்று வந்ததாக சமூக ஊடகங்களில் பரப்பப்பட்ட தகவல்களுக்கு அவ்வாறு பதிலளித்த அவர், அச்சம்பவத்துக்கான காரணத்தைக் கண்டறிய, விசாரணை நடந்து வருவதாக, கூறினார்.