← Back to list

சட்டம் உங்கள் கையில் அல்ல !

Jan 21, 2025

சட்டத்தை கையில் எடுத்துக் கொள்ளாதீர் ! 

அரசாங்க பேச்சாளர் Fahmi Fadzil, பொதுமக்களை அவ்வாறு கேட்டுக்கொண்டுள்ளார். 

எந்த குற்றச் சம்பவங்களாக இருந்தாலும், அதனை விசாரிக்க காவல்துறையினர் இருக்கின்றனர்; அதற்கு வழிவிடும்படி Fahmi கேட்டுக்கொண்டார். 

அண்மையில் திரங்கானுவில் மாற்றுத்திறனாளி ஆடவர் ஒருவர் தாக்கப்பட்டதை Fahmi மேற்கோள்காட்டினார். 

மனநலம் பாதிக்கப்பட்ட அந்நபர் செலுத்திய மோட்டார் சைக்கிள், விவசாயச் சந்தைக் கடை ஒன்றை மோதியதில், அங்குள்ள சிலர் ஆத்திரமடைந்து அந்நபரைக் கடுமையாகத் தாக்கியது குறிப்பிடத்தக்கது. 

------- 

இவ்வேளையில், பொது பல்கலைக்கழகங்களில் WIFI இணையச் சேவையை மேம்படுத்த, 60 கோடி ரிங்கிட்டுக்கும் மேல் ஒதுக்கப்பட்டுள்ளதாக Fahmi கூறினார்.

அப்பல்கலைக்கழகங்களில் WIFI இணைப்பு மோசமான நிலையில் இருப்பதாகக் கூறப்படுவதை அடுத்து, அத்திட்டம் முன்னெடுக்கப்பட்டுள்ளதாக அவர் கூறினார். 

------- 

பெருநாள் காலங்களில் இனி இலவச டோல் கட்டணச் சலுகை வழங்கப்படாது என்றும், அதற்கு பதிலாக அரசாங்கம் மாற்று நடவடிக்கையைச் செயல்படுத்தும் எனவும் பொதுப்பணித் துறை அமைச்சர் Datuk Alexander Nanta Linggi தெரிவித்துள்ளார்.  

கடந்தாண்டே அமைச்சரவை அம்முடிவை எடுத்து விட்டது என்றாரவர்.

------- 

சிலாங்கூர் கிள்ளானில் உள்ள, எரிவாயு சேமிப்பு தொழிற்சாலையில் ஏற்பட்ட வெடிவிபத்தில், 32 பேர் காயமடைந்துள்ளதாக காவல்துறை தெரிவித்துள்ளது. 

அவர்கள் அனைவரும் வெடிப்பு நடந்த இடத்தைச் சுற்றி இருந்ததாக தெரிவிக்கப்பட்டுள்ளது. 

-------- 

அமெரிக்க அதிபராக பதவியேற்ற முதல் நாளிலேயே, Donald Trump அதிரடி நடவடிக்கைகளை அறிவித்துள்ளார் !  

அவற்றில் குறிப்பாக, அமெரிக்காவில் இனி ஆண் - பெண் ஆகிய இரு பாலினங்கள் மட்டுமே அங்கீகரிக்கப்படும்; ராணுவத்தில், மாற்று பாலினத்தவர்களுக்கு தடை எனக் கூறிய Trump, சிறார் பாலின மாற்று அறுவை சிகிச்சைக்கு்ம் தடை என்றார்.  

WHO எனப்படும் உலக சுகாதார அமைப்பில் இருந்து, அமெரிக்கா வெளியேறும் எனவும் Trump அறிவித்துள்ளார்.  

TikTok-கைத் தடை செய்யும் சட்டம் நடைமுறைப்படுத்தப்படுவதை, 75 நாள்களுக்குத் தள்ளி வைக்கும் உத்தரவிலும் அவர் கையெழுத்திட்டுள்ளார்.