← Back to list

இரண்டாம் கட்டப் பதிவு தொடங்கியிருக்கிறது!

May 23, 2021

AstraZeneca தடுப்பூசியைத் தன்னார்வ முறையில் போட்டுக் கொள்ள முன் வருவோருக்கான இரண்டாம் கட்டப் பதிவு தொடங்கியிருக்கிறது. 

கிள்ளான் பள்ளத்தாக்கு, ஜொகூர், பினாங்கு, சரவாக்கில் உள்ள 60 வயதுக்கு மேற்பட்டவர்கள் அதற்குப் பதிந்து கொள்ள ஊக்குவிக்கப்படுகின்றனர். 

12 லட்சத்து 40 ஆயிரம் AstraZeneca தடுப்பூசி டோஸ்கள் வயதானவர்களுக்கு வழங்கப்படுகிறது.

இவ்வேளையில், இம்மாதத் தொடக்கத்தில் முதல் கட்டப் பதிவின் போது காத்திருப்போர் பட்டியலின் கீழ் பதிந்து கொண்டவர்கள், இயல்பாகவே இம்முறை சேர்த்துக் கொள்ளப்படுவர்.

பேரா, Indera Mulia அரங்கில் உள்ள தடுப்பூசி போடும் மையத்தில் கடந்த வெள்ளிக்கிழமை வழக்கத்திற்கு மாறான நெரிசல் ஏற்பட்டதற்கு தடுப்பூசி போட்டுக் கொள்ளத் தேதி கொடுக்கப்பட்டவர்கள் உரிய நேரத்தைப் பின்பற்றாததே காரணம்.

அன்றைய தினம் ஆயிரத்து 570 பேருக்குத் தடுப்பூசி போட்டுக் கொள்ள MySejahtera வழி அழைப்பு கொடுக்கப்பட்டிருந்தது.

இருப்பினும் அழைப்பு இல்லாமல் கிட்டதட்ட 800 பேர் அங்குச் சென்றதால் நெரிசல் ஏற்பட்டதாக மாநில சுகாதார இயக்குனர் தெளிவுபடுத்தினார்.   

நாட்டில் Covid-19 சம்பவங்களின் தினசரி எண்ணிக்கை அதிகரித்து வரும் நிலையில், முழு முடக்கத்தை அமல்படுத்தாத முடிவை அரசாங்கம் தற்காத்துப் பேசியிருக்கிறது.

அது ஒரு எளிதான முடிவல்ல.

மலேசியர்களின் சுகாதாரம், பொருளாதாரம் என இரு முக்கிய அம்சங்களைச் சீர் தூக்கிப் பார்த்து எடுக்கப்பட்ட முடிவு அதுவென பாதுகாப்பு விவகாரங்களுக்கான மூத்த அமைச்சர் Datuk Seri Ismail Sabri Yaakob விளக்கினார்.

கடந்தாண்டு முழுமையான நடமாட்டக் கட்டுப்பாட்டு ஆணை அமல்படுத்தப்பட்ட போது வணிகத் துறையினர், சிறிய அளவிலான வணிகர்கள் என பலர் வருமானத்தை இழந்ததை அவர் சுட்டிக் காட்டினார்.

சுய தனிமைப்படுத்தலைக் கடைப்பிடித்து வீட்டிலேயே இருக்குமாறு மலேசியர்களுக்கு ஆலோசனை கூறப்படுகிறது.

அவசர, அவசியத் தேவையில்லாமல் வீட்டை விட்டு வெளியேற வேண்டாம் என சுகாதாரத் தலைமை இயக்குனர் மீண்டும் கேட்டுக் கொண்டார்.

Covid-19 பெருந்தொற்றை அழிப்பது அனைத்து தரப்பினரின் கடப்பாடு எனக் குறிப்பிட்ட அவர், பொதுமக்களின் ஒத்துழைப்பு மிக அவசியமாவதாக எடுத்துரைத்தார்.